உலகத் தமிழர்களின் வேர்களை வலுப்படுத்தும் அழைப்பு: குழந்தைகளை தமிழ்நாட்டிற்கு அழைத்து வருமாறு உதயநிதி ஸ்டாலின் வேண்டுகோள்

தமிழ்நாடு துணை முதல்வர் உதயநிதி ஸ்டாலின், வெளிநாடுகளில் வாழும் தமிழர்கள் தங்கள் குழந்தைகளை தமிழ்நாட்டிற்கு அழைத்து வந்து, இங்குள்ள பண்பாடு, பாரம்பரியம் மற்றும் வாழ்வியலை நேரடியாக அனுபவிக்கச் செய்ய வேண்டும் என வலியுறுத்தினார். சென்னை நந்தனம் மாநாட்டு மையத்தில் நடைபெற்ற என்.ஆர்.ஐ. தினம் 2026 விழாவில் உரையாற்றிய அவர், உலகம் முழுவதும் பரவி வாழும் தமிழர்களுக்கும் தமிழ்நாட்டுக்கும் இடையிலான பண்பாட்டு பிணைப்பை மேலும் வலுப்படுத்த வேண்டிய அவசியத்தை எடுத்துரைத்தார்.

உலகின் பல நாடுகளில் இருந்து நேரிலும் இணைய வழியிலும் கலந்து கொண்ட தமிழர்களை நோக்கி பேசிய உதயநிதி ஸ்டாலின், புவியியல் தூரம் இருந்தாலும், தமிழர்களின் உணர்வுப்பூர்வமான தொடர்பு தமிழ்நாட்டுடன் என்றும் நிலைத்திருப்பதாகக் கூறினார். வரலாற்றுச் சின்னங்கள், பண்பாட்டு மையங்கள், பாரம்பரிய இடங்களை குழந்தைகள் நேரில் காணும் போது, அவர்களுக்குள் தமிழர் அடையாளம் ஆழமாக பதியும் என்றும், அது அவர்களை தாயகத்துடன் உறுதியாக இணைக்கும் என்றும் அவர் தெரிவித்தார்.

வெளிநாடுகளில் வாழும் தமிழர்கள் பல்வேறு பண்டிகைகளை கொண்டாடினாலும், குடும்ப உறவுகளையும் தமிழர் பண்பாட்டையும் ஒருங்கிணைக்கும் பண்டிகையாக பொங்கல் திகழ்வதாக அவர் குறிப்பிட்டார். இத்தகைய பாரம்பரிய அனுபவங்கள், அடுத்த தலைமுறையினருக்கு தமிழ்நாட்டின் தனித்துவத்தை உணர்த்தும் எனவும் அவர் கூறினார்.

தமிழ்நாடு அரசின் வெளிநாடு வாழ் தமிழர் நலத்துறை மற்றும் தமிழ் இணையக் கல்விக்கழகம் இணைந்து நடத்திய என்.ஆர்.ஐ. தினம் 2026 விழாவில், இலங்கை உள்ளிட்ட பல நாடுகளைச் சேர்ந்த மாணவர்கள், இளைஞர்கள் மற்றும் தொழில்முனைவோர்களுக்கான இணையவழிப் போட்டிகள் நடத்தப்பட்டன. கட்டுரை, பேச்சு, குறும்படம், வினாடி வினா உள்ளிட்ட பிரிவுகளில் வெற்றி பெற்ற 15 பேருக்கு உதயநிதி ஸ்டாலின் விருதுகளை வழங்கி பாராட்டினார்.

“தமிழால் ஒன்றிணைந்து, உலகில் உயர்வோம்” என்ற கருப்பொருளுடன் நடைபெற்ற இந்த விழா, உலகத் தமிழர்களின் ஒற்றுமையையும் முன்னேற்றத்தையும் வலியுறுத்தியது. திராவிட மாடல் ஆட்சியின் காரணமாக தமிழர்கள் உலகளவில் உயர்ந்த நிலைகளில் திகழ்வதோடு, தங்கள் பண்பாட்டு வேர்களையும் காத்து வருவதாக அவர் தெரிவித்தார். முதல்வர் மு.க. ஸ்டாலின் தொடங்கிய வெளிநாடு வாழ் தமிழர் அடையாள அட்டை உள்ளிட்ட திட்டங்கள், தாயகத்துடன் உள்ள உறவை வலுப்படுத்தும் முயற்சிகளாக அவர் சுட்டிக்காட்டினார்.

விழாவின் ஒரு பகுதியாக, என்.ஆர்.ஐ. தினம் 2026 நினைவுச் சிறப்பு மலரை உதயநிதி ஸ்டாலின் வெளியிட்டார். தனியார் நன்கொடையாளர் வழங்கிய ரூ.1 லட்சம் மதிப்புள்ள வீணை, சென்னை மொரிஷியஸ் கௌரவ தூதர் மூலம் மொரிஷியஸ் தமிழ் சங்கத்திற்கு வழங்கப்பட்டது. மேலும், என்.ஆர்.ஐ. தின நிகழ்வுகளை பிரதிபலிக்கும் கண்காட்சியும் திறந்து வைக்கப்பட்டது.