15.05.2025 – தமிழீழம்
வீரவணக்கம்
வீரவேங்கை
புலியரசன்
வேலாயுதபிள்ளை சதானந்தன்
முல்லை. மாவட்டம்
வீரப்பிறப்பு: 19.07.1981
வீரச்சாவு: 15.05.2009
முள்ளிவாய்க்கால் சமரின் போது 15.05.2009 அன்று வீரச்சாவைத் தழுவிக்கொண்டார்.
வீரவேங்கை புலியரசன்
முல்லைத்தீவு மாவட்டத்தைச் சேர்ந்த திரு. திருமதி வேலாயுதம்பிள்ளை இணையரின் மகனாக 19.07.1981 இல் சதானந்தன் பிறந்தார்.
சிறுவயது முதலே கல்வியிலும் விளையாட்டுகளிலும் திறமை மிகு மாணவனாக வளர்ந்து வந்த சதானந்தன். தமிழீழத் தேசியத் தலைவரின் வழிகாட்டலில் ஆரம்பித்த எமது விடுதலைப் போராட்டத்தின் மூலம் எமது இனத்தின் விடுதலையை வென்றெடுக்க வேண்டிய அவசியத்தினை உணர்ந்து கொண்டவராக 2003 ஆம் ஆண்டு விடுதலைப் புலிகள் அமைப்பின் போராளியாக இணைந்து கொண்டார்.
புலியரசன் என்னும் பெயருடன் அடிப்படைப் பயிற்சிகளை நிறைவு செய்து கொண்டவர். 2004 இல் நிதித்துறையினால் நடத்தப்பட்ட விவசாயக் கற்கை நெறிக்காகத் தெரிவாகி நிதித்துறைப் பொறுப்பாளரின் நேரடி கண்காணிப்பில் படித்து வந்தார்.
போர்க்களம் செல்ல வேண்டுமென்ற எண்ணம் இவரது சிந்தையில் மேலோங்கி நின்றதால் அதற்காகத் தனது துறைப் பொறுப்பாளரிடம் அனுமதியைக் கேட்டுவந்தார். இதனால் நிதித்துறை ஆளுகைச் செயலகத்திற்கு அழைக்கப்பட்ட புலியரசன் அங்கு ஊர்தி ஓட்டுநராகவும். சிறப்புப் பணிகளை ஆற்றுபவராகவும் வழங்கப்பட்ட பணிகளில் ஈடுபட்டு வந்தார்.
சிறிது காலம் நிதித்துறை பொறுப்பாளரின் ஊர்தி ஓட்டுநராகப் பணியாற்றி வந்தார். இக்காலப் பகுதியில் நிதித்துறை சார்ந்த நடவடிக்கைகளைத் தென்தமிழீழத்திற்கு விரிவுபடுத்துமாறு தமிழீழத் தேசியத் தலைவரால் அறிவிக்கப்பட்டது. இதன் காரணமாக தென்தமிழீழத்திற்கு நிதித்துறைப் போராளிகளை அனுப்ப வேண்டிய தேவை ஏற்பட்டது.
புலியரசனின் ஊர்தி ஓட்டும் திறன், அவரது நேர்மையான செயற்பாடுகள் போன்றவற்றைக் கவனித்த நிதித்துறைப் பொறுப்பாளர் 2005 காலப் பகுதியில் நிதித்துறைப் பணிகளுக்காகச் சென்ற அணியினருடன் போர் ஊர்திப் பணிகளுக்காக மட்டக்களப்பு மாவட்டத்திற்கு அனுப்பி வைத்தார்.
சாதாரண ஓட்டுநர்கள் போர் நடக்கும் பிரதேசங்களில் ஊர்திகள் ஓட்டமுடியாது. ஓட்டும் போராளிகள் மனத்துணிவு, புத்திசாலித்தனம், எந்த நெருக்கடியான நிலையிலும் விரைந்து முடிவெடுக்கும் திறன். சிறந்த அவதானிப்பு மிக்கவர்களாகவும் இருக்க வேண்டும்.
இவை அனைத்தும் கொண்ட போராளியாக புலியரசன் செயற்பட்டார். 2006 காலப்பகுதியில் தென்தமிழீழப் பகுதிகளில் போர் ஆரம்பமாகிய வேளையில் தனது பணியை அத்தனை சிரமங்களையும் கடந்து ஆற்றிநின்ற போராளியாய் புலியரசன் பேசப்பட்டார்.
விழுப்புண் அடைந்து போராளிகளை எறிகணை வீச்சுகளுக்கும் குண்டுத்தாக்குதலுக்கும் நடுவே இவரது ஊர்தியில் ஏற்றி வந்து உரிய நேரத்தில் அவர்களை மருத்துவமனைக்குள் சேர்த்து விடுவார்.
இவர் 2007 காலப்பகுதியில் மட்டக்களப்பு மாவட்டத்தில் இருந்து வன்னிக்கு அழைக்கப்பட்டார். அங்கு நிதித்துறைப் பொறுப்பாளர் தமிழ்க்குமரனின் ஓட்டுநராகவும் அவரின் உதவியாளராகவும் பணிபுரிந்தார். அதன்பின் நிதித்துறைப் படையணியில் இணைக்கப்பட்டு. வன்னி பெருநிலப்பரப்பை நோக்கி முற்றுகையிட்டு முன்னேறிய இரானுவத்தினரை எதிர்த்து நிதித்துறைப் படையணியுடன் இணைந்து எதிர்த்தாக்குதலில் களமாடி வந்தார்.
2009 ஆரம்பம் வரை களத்தில் நின்ற அவரை நிதித்துறைப் பொறுப்பாளர் மீண்டும் தனது ஊர்தி ஓட்டுநராகவும் உதவியாளராகவும் அழைத்து இருந்தார். அதனை ஏற்ற புலியரசன் நிதித்துறைப் பொறுப்பாளருடன் இணைந்து தோளோடு தோள் நின்று இறுதிக்கணம் வரை தேச விடுதலைக்கான களத்தில் தன்பணிகளை ஆற்றி, 15 மே 2009 அன்று தமிழீழம் என்ற உயரிய இலட்சியத்திற்காகக் காவியமாகிய நாயகர்களுடன் மீளாத்துயிலில் ஆழ்ந்து கொண்டார்.
தன் இனத்தின் விடுதலைக்காகக் களமாடி தம் இன்னுயிர்களை ஆகுதியாக்கிய இம்மாவீரர்களைத் தமிழினம் என்றும் மறந்து விடாது.
இவர்களின் கனவுகளை சுமந்தவர்களாய் அவர்களின் இலட்சியப்பாதையில் இனிவரும் எங்கள் சந்ததியின் வழிகாட்டிகளாக எங்கள் மாவீரர்கள் என்றும் வாழ்ந்து கொண்டே இருப்பார்கள்.
வீரவேங்கைகளின் வீரத்தடங்களோடு…
“நாம் ஒரு இலட்சிய விதையை விதைத்திருக்கின்றோம். அதற்கு எமது வீரர்களின் இரத்தத்தைப் பாய்ச்சி வளர்க்கின்றோம். இந்த விதை வளர்ந்து விருட்சமாகி எமது மாவீரர்களின் கனவை நனவாக்கும்”
– தமிழீழத் தேசியத் தலைவர் மேதகு வே.பிரபாகரன்.
ஒரு புனித இலட்சியத்திற்காக வாழ்ந்து, அந்த இலட்சியத்திற்காகவே போராடி, அந்த இலட்சியத்தை அடைவதற்காகத் தமது வாழ்வைத் தியாகம் செய்த எம் மாவீரர்கள் மகத்தானவர்கள்.
எம் மாவீரர்களின் அற்புதமான தியாகங்கள், அவர்களின் உயரிய அர்ப்பணிப்புகள், அவர்கள் அனுபவித்த துன்பதுயரங்கள், ஏக்கங்கள், அவர்கள் கண்ட கனவுகள் இவை எல்லாவற்றையும் கொண்ட ஒட்டு மொத்த வெளிப்பாடாகவே எமது விடுதலைப்போராட்ட வரலாறு இன்றும் வழிகாட்டிநிற்கின்றது.
மாவீரரது வரலாற்றைப் பதியம் செய்து, அடுத்த தலைமுறைகளுக்குச் சரியான முறையில் கொண்டுசேர்க்கும் முயற்சியாக இவ் ஆவணத்தை ஆண்டுதோறும் நவம்பர் 27 தமிழீழத் தேசிய மாவீரர்நாளில் வெளியிட்டுவைப்பதில் நாங்கள் பெருமையடைகின்றோம்.
தமிழீழ விடுதலைப் போராட்டமானது அளப்பரிய தியாகங்களைப் புரிந்து, பல்லாயிரம் மாவீரர்களை விதையாக விதைத்து இன்றும் அதே இலட்சியப் பாதையில் பயணித்துக்கொண்டிருக்கிறது.
இந்த இலட்சியப்பயணத்தில் வீரச்சாவடைந்தவர்களுக்கு தரநிலை வழங்கியதனூடாக எமது இராணுவ வளர்ச்சியையும் விடுதலைப்போராட்ட பரிணாமத்தையும் தமிழீழ விடுதலைப் புலிகள் அமைப்பு உலகறியச்செய்தது.
சங்கர் சத்தியநாதன் என்ற போராளி, எமது தமிழீழ விடுதலைப் புலிகள் இயக்கத்தின் முதல் மாவீரராக அடையாளப்படுத்தபடும்போது, லெப்டினன்ட் சங்கர் என்று சர்வதேச இராணுவ தகுதிநிலை/தரநிலை வழங்கப்பெற்று எமது தமிழீழத் தேசியத் தலைவர் அவர்களால் மதிப்பளிக்கப்பெற்றார்.
1982 நவம்பர் தொடக்கம் 2009 மே வரையிலான போராட்ட காலப்பகுதியில், அதன் இராணுவப் பரிணாம வளர்ச்சிக்குத் தக்கதாக சர்வதேச இராணுவத் தரநிலையில் பிரிகேடியர் என்னும் உயர்நிலையினை எமது விடுதலை இயக்கம் வழங்கியிருந்தது.
2009 ஆம் ஆண்டு நெருக்கடியான போர்ச்சூழலில் இறுதிவரை உறுதியோடு நின்று போராடி வீரச்சாவடைந்த பல நூற்றுக்கணக்கான போராளிகள் மற்றும் தளபதிகள் உரிய முறையில் அடையாளப்படுத்தப்படாமல், உரிமை கோரப்படாமல் மதிப்பளிக்க முடியாத களச்சூழ்நிலையில் இன்று, தகுந்த ஆதாரங்களோடு உறுதி செய்யப்பட்ட மாவீரர்களை அவர்களின் பெற்றோர் மற்றும் உரித்துடையோர் அனுமதியுடன் வெளிப்படுத்தி, அனைத்து நாடுகளிலும் வீரவணக்க நிகழ்வினை நடாத்தி அவர்களுக்கான வணக்கத்தைச் செலுத்திவருகின்றோம்.
இம்மாவீரர்களை எமது அமைப்பின் மரபுரீதியாக வீரவேங்கை என்றே தொடர்ந்தும் அடையாளப்படுத்தியுள்ளோம். ஆனால், இது மாவீரர்களின் இராணுவத் தரநிலையினைக் குறிப்பதாக அடையாளப்படுத்தி நிற்கவில்லை. மாறாக, தமிழீழ விடுதலைப்புலிகள் இயக்கத்தின் அக, புறச் சூழ்நிலைகள் முற்றிலும் பாதகமாக அமைந்திருந்தபோதும் பல இயக்கங்கள் உருவாகியபோதும் அதனைச் சவாலாக ஏற்றுக் களமாடிய எமது இயக்கம், உலகின் வேறு விடுதலை இயக்கங்களையும் விட வேறுபட்டும் மேம்பட்டும் நிற்கும் தனித்துவமான வீரவரலாற்றை வீரவேங்கை அடையாளப்படுத்தி நிற்கின்றது.
வீரவேங்கை என்பது தமிழீழத் தேசியத் தலைவர் அவர்களால் அங்கீகரிக்கப்பட்டு துயிலுமில்லத்தில் வாசிக்கப்படும் வீரவணக்கம் என்று ஆரம்பிக்கும் மாவீரர் உறுதிப்பிரமாணப் பத்திரத்தில் ஒவ்வொரு மாவீரர் பெயருக்கும் முன்பாக வீரவேங்கை என்று சிறப்பாக அடையாளப்படுத்தப்பட்டு. இராணுவத்தரநிலையுடன் பெயர் குறிப்பிடப்பட்டு, வீரவணக்கம் செலுத்தப்பட்டதோடு வித்துடல் விதைக்கப்பட்டது.
இவ் வீரவேங்கை என்ற தனிச்சிறப்பு அடையாளம், வரலாறாக அவர்களின் கல்லறைகளிலும் பொறிக்கப்பட்டுள்ளது.
தமிழீழ விடுதலைப் புலிகளது தனித்துவ அடையாளமிக்கதும் அறம், வீரம், உயர் ஒழுக்கம், உயர் அர்ப்பணிப்பு, மண்பற்று, கொள்கைப்பற்று, தலைமைப்பற்று என அதி உன்னத குணாதிசயங்களையும் இந்த வீரவேங்கை தன்னகத்தே தாங்கிநின்று பெருமைகொள்கின்றது.
எனவே, இக்காலத்தில் வாழ்ந்தவர்கள் என்ற வரலாற்றுக்குரியவர்களுக்கு வீரவேங்கை என்பது வரலாற்றுரீதியான மறுக்கமுடியாத ஒன்று. ஆகவே, எமது அமைப்பின் தற்போதுள்ள சூழமைவில் வீரவணக்கம் செலுத்தும் மாவீரர்களுக்கு, இராணுவத்தரநிலை வழங்கமுடியாதுள்ளதனால் எமது அமைப்பின் மரபுரீதியான வீரவேங்கை தனித்துவத்தையே நாம் பின்பற்றியுள்ளோம்.
