15.05.2025 – தமிழீழம்.
பிரிகேடியர்
சசிக்குமார் மாஸ்ரர்
பன்னாட்டு சதிகளுடன் சிறிலங்கா அரச இராணுவமும் இணைந்து மேற்கொண்ட தமிழின அழிப்பிற்கு போரிற்கு எதிராக,களமாடி நின்றவேளை முள்ளிவாய்க்கால் மண்ணில் 15.05.2009 அன்று வீரச்சாவைத் தழுவிக்கொண்ட ,தமிழீழ விடுதலைப்புலிகளின் மூத்த உறுப்பினரும் தமிழீழ விடுதலைப்புலிகளின் முதன்மைத் தளபதிகளில் ஒருவராக விளங்கிய வருமான சசிக்குமார் “சசி மாஸ்டர் “என்று அழைக்கப்படும் பிரிகேடியர் சசிக்குமார் அவர்கள் தமிழீழ விடுதலைப் போராட்டத்தின் பெருவிருட்சமாக நின்று வழிகாட்டிய உன்னத போராளியாவார்.
முள்ளிவாய்க்காலினை முற்றுகையிட்டு, மும்முனைகளில் கண்மூடித்தனமாக தாக்குதலைத் தொடுத்த வண்ணம் முன்னேறிய இராணுவத்தை எதிர்த்து போராளிகள் களமாடி நின்றவேளை ,களமுனையில் நின்று போரினை வழிநடாத்திய எங்களின் முதன்மைத் தளபதிகளில் ஒருவரான சசிக்குமார் மாஸ்ரர் 15.05.2009 அன்று முள்ளிவாய்கால் பகுதியில் சிறீலங்காப் படையினருடனான மோதலின்போது வீரச்சாவடைந்துள்ளார்.
என்றும் மாபெரும் இராணுவ வீரனைப்போல் உயர்ந்த உருவமும் விரிந்த மார்பினையும் கொண்டு, இடையிலே கைத்துப்பாக்கியோடு காட்சிதரும் அழகே அனைவரையும் மலைக்க வைக்கும்.
தமிழீழ விடுதலைப் புலிகளால் ஒரு சிங்களப் படைமுகாம் மீது தாக்குதல் நடத்துவதற்கு முன்னர் அப்படைமுகாம் சார்ந்தும் எதிரிகளின் படைபலம், படைக் கட்டமைப்புக்கள் சார்ந்தும் அப்படைமுகாமின் பலவீனம் சார்ந்தும் வேவுத் தகவல் பெறுவதென்பது இன்றியமையாத தொன்றாகும்.இலக்கு வைக்கப்படும் முகாமின் தகவல்களை அறிந்து, நேரில் அவதானித்து அதனை அறிக்கையாகவும் வரைபடமாகவும் வழங்கும் மாபெரும் பணி சிறப்பு வேவுப்படையணிக்குரிதாகும். வேவு அணிக்கான பயிற்சிகள் கடுமையாகவும் துணுக்கமாகவும் இருக்கும்.
ஏனெனில், எதிரியின் முகாமினுள் சென்று,அங்கே தங்கிநின்று ,ஊண்-உறக்கமின்றி தரவுகளைப் பெற்று, முகாமிலிருந்து வெளியே வரவேண்டும்.வேவு என்பது சாதாரணமான விடயம் அல்ல.வேவுப் போராளிகள் வழங்கப்படும் தகவல்களுக்கேற்ப தான் தாக்குதலுக்கான முடிவும் தாக்குதல் திட்டமும் எடுக்கப்படும்.
எமது இழப்பினைக் குறைத்து முகாமினைத் தகர்ப்பதற்கு ஏற்ப திட்டமிடல்களை வகுப்பதற்கு அடிப்படையானதே வேவுத் தகவல் தான்.இவ்வாறான ,எதிரியின் அனைத்து நடவடிக்கைகளையும் கண்காணித்துப் பின் திட்டமிட்டு அதற்கேற்ப போராளிகளுக்கான பயிற்சி நடவடிக்கை மற்றும் சமர்களுக்கான தகவல்களை வழங்குவதற்குமாக வேவுப்பிரிவு என்னும் தனிப்படைப் பிரிவு தமிழீழத் தேசியத்தலைவர் அவர்களால் உருவாக்கப்பட்டது. அதன் சிறப்புத் தளபதியாக சசிக்குமார் மாஸ்ரர் நியமிக்கப்பட்டார்.
அந்த உன்ன வெற்றிப் பணிக்காக,அவர் அல்லும் பகலும் தன் உழைப்பாலும் போராளிகளின் ஈகம் நிறைந்த பெரும் பணியின் தரவுகளுக்கு உயிர்கொடுத்து,வரைபடைமுலம் உயிரோட்டம் கொடுத்து தாக்குதலுக்கான முகவுரை எழுதியவரில் பிரிகேடியர் சசிக்குமார் மாஸ்ரரின் பங்கும் அளப்பெரியது என்றால் மிகையாகாது.
தமிழீழத் தேசியத்தலைவரின் வழிகாட்டலில் இவரின் வளர்ப்பில் வார்த்தெடுத்த பல போராளிகள், தங்கள் ஈகத்தால் எம் தாய்மண்ணில் பல சரித்திரம் எழுதி சென்றார்கள். பின் தளத்தில் நின்று குறைந்த இழப்பில், தாக்குதலுக்கான பல வழிகளை தன வரைபடம் வெளிப்பாட்டின் நேர்த்தியான ஆற்றல் மூலம் வடிவமைத்து ,திட்டமிட்டு தலைமையிடம் சமர்பித்த நேர்த்தியான தலைமைத்துவம் கொண்ட அர்ப்பணிப்பாளன்.தேசத்தின் மீது கொண்ட காதலாலும் தமிழீழ விடுதலையின் வேகத்தாலும் அர்ப்பணிப்பு மிக்க செயற்பாட்டினாலும் தேசியத்தலைவரிடம் மதிப்பும் – நம்பிக்கையும் கொண்டு விளங்கியவர் பிரிகேடியர் சசிக்குமார் அவர்கள்.
பிரிகேடியர் ” சசிக்குமார் மாஸ்ரர் ” அவர்கள் ,அன்புடனும் மரியாதையுடன் போராளிகளை அரவணைத்து நேசித்து வளர்த்தெடுத்த பேராசான் ஆவார்.போராளிகளுக்கான பயிற்சி , அதிகாரிகளுக்கான பயிற்சி, வேவு அணிகளுக்கான பயிற்சி மற்றும் தாக்குதலிற்கான பயிற்சி என போராளிகளை புடம்போட்ட சிற்பி பயிற்சிகள், வேவுத்திட்டமிடல்கள் ,வரைபடம் உருவாக்கல் மற்றும் பல தாக்குதல் வேவுத் திட்டமிடல்கள் போன்ற பணிகள் சிறப்பாக முன்னநகர்த்தப்பட்ட போது,அவரின் மீது பெருமதிப்பு போராளிகளுக்கு ஏற்பட்டதுடன் அவரின் அன்பான தன்வழிநடத்தலால் அனைவர் மனதிலும் இடம் பிடித்தார். ஆயினும் மக்கள் மத்தியில் பெரியளவில் அறியப்பட்டவர் அல்ல.ஆயினும் வெளியில் தெரியா வேரின் வெளிச்சமாக நாளும் தொடர்ந்த தன் தேசபணிகளால் பல வெற்றிகளுக்கு சொந்தக்காரனானார்.
தன் வாழ்நாளை தாய்நாட்டின் விடியலுக்காக அர்பணித்த பிரிகேடியர் சசிக்குமார் அவர்களின் வாழ்வியலினை மீட்டிப்பார்த்தால்,அவர் வேவுப்பிரிவின் சிறப்புத் தளபதியாக இருந்து,வரைபடைத்துறை – வேவுப்புலிகள் பிரிவின் ஈகத்தை தியாக உணர்வை அவர்கள் தாய்நாட்டிற்காக அர்பணித்த பெரும் தியாகங்கள் என சொல்லில் அடங்காதவை.
விடுதலை சுவடுகள்,உங்கள் மனதை தாய்மண்ணின் நினைவுடன் ஆளட்டும்.பிரிகேடியர் சசிக்குமார் மாஸ்ரர் விடுதலை பயணத்தில் அவரின் கடமை எவ்வளவு முக்கியம் வாய்ந்தது என்பதையும் வேவுப்புலிகளின் ஈகத்தை அதன் வெற்றியை ஓர் கணம் உணர்ந்து பாருங்கள் !தமிழீழ மண்ணில் பல சிங்களப் படைமுகாம் மீதான தாக்குதலின் தார்ப்பரியத்தை விளங்கிக்கொள்ள வேண்டுமானால் , வேவு வீரர்களைப் புரிந்து கொள்ள வேண்டும். அனைத்து தாக்குதல்களையும் பின்னூட்டத்தில் வேவுப்புலிவீரர்கள் பெற்றுத்தந்த வெற்றிகள் யாவும் என்பதை யாவரும் மறந்துட முடியாது.ஆயினும் வெளிச்சத்திற்கு இந்த விடுதலை உரங்கள் தெரிவதில்லை என்பதே உண்மை …
எங்களது வேவு வீரர்கள் அபூர்வமான மனிதர்கள். சாவுக்கும் அஞ்சாத அவர்களது வீரத்தை எண்ணிப்பாருங்கள். அது போற்றுதற்குரியது. பகைவனின் நெஞ்சுக்கூட்டுக்கு மேலேறி வேவு பார்த்துவிட்டு மீளும் அந்த மனத்துணிவு அபாரமானது. அது ஒரு இணையற்ற நெஞ்சுறுதி! தாங்கள் கொண்ட இலட்சியத்தில் அவர்கள் எத்துணை பற்றுக் கொண்டவர்களாக இருந்தார்கள் என்பதை உணர்வோடு மீட்டிப் பார்க்க வேண்டும்.அந்த இலட்சியத்திற்காகத் தங்களது இன்னுயிரையே துச்சமெனத் தூக்கி எறிய மனமுவந்து நிற்கும் அவர்களது தியாக உணர்வு, மேன்மை மிக்கது உன்னதமானது!
தாயகத்தின் மீதும் தாயகத்து மக்கள் மீதும் அவர்கள் கொண்டிருந்த நேசம் இருக்கிறதே …. அது சாதாரணமானதல்ல. அது ஒரு அளவு கடந்த காதல். தளர்ச்சியற்ற பிணைப்பு !அந்த வீரர்களின் ஒவ்வொரு அசைவுக்குப் பின்னால் இருந்தும், எதிரியின் குண்டுக்கு மத்தியில் நின்று அவர்கள் எடுத்த ஒவ்வொரு முடிவிற்குப் பின்னால் இருந்தும், அவர்களை இயக்கிக் கொண்டிருந்த உந்துவிசை – அவர்களுடைய அந்த ” மனநிலை ” தான்.
எங்கள் அன்னைபூமியை ஆக்கிரமித்தி நிற்கும் சிங்களப் படைகளின் மிகப் பெரியதும், மிகவும் பாதுகாப்பானதுமான பல தலைமையகப் படையரணுக்குள்ளும் வேவுப்புலி வீரர்களின் தடம் பதிந்துள்ளது. பன்னாட்டு சக்திகளும் – சிறீலங்கா அரசும் இணைந்து எம் மக்களைக் கொன்று குவித்து இனவழிப்பை அரங்கேற்றிய இனவெறியர்களுக்கு எதிராக விடுதலை தாகத்துடன் பல போராளிகளுடன் இணைந்து களமாடி, முள்ளிவாய்க்கால் மண்ணில் 2009ம் ஆண்டு மே 15ம் நாள் ஆயிரம் ஆயிரம் மாவீரர்களுடன் தமீழீழத்தின் பெருவிருட்சமான பிரிகேடியர் சசிக்குமார் அவர்களும் இணைந்துகொண்டார்.
