இருபது ஆண்டுகள் முன்பின் நினைவுப் பக்கத்தைத் திறந்தால்
மண்ணின் மணமும்,
போரின் புகையும்,
வீரத்தின் நெருப்பும்
என் உள்ளம் முழுவதும் பரவி விடுகிறது.

அது தான் –
எங்கள் இரத்தத்தால் நனைந்த,
எங்கள் உயிரால் எழுப்பப்பட்ட,
எங்கள் கனவால் நிறைவுற்ற
தாய் நாடு… தமிழீழம்.

செல்வச் செழிப்பின் கண்கவர் மாளிகைகள் இல்லாவிட்டாலும்,
எங்கள் உழைப்பின் பனி, வியர்வை, நம்பிக்கை –
அவையே எங்கள் வீடுகளின் தூண்கள்.
பிறர் தரும் பிச்சையால் அல்ல,
எங்கள் சொந்தக் கைகளால் பெற்ற உண்டியால்
அன்றாடம் சமைத்து உண்ந்தோம்.

வயல் பசுமையில் கதிரவன் விளையாட,
மீனவக் கப்பலில் அலைகள் இசை பாட,
கைவினைப் பணியில் உழைப்பின் மணம் வீச,
ஒவ்வொரு மனிதனும் தன் சொந்தக் காலில் திகழ்ந்தான்.

அது மட்டும் அல்ல –
எங்கள் நிலத்தில் இயங்கியது
ஒரு சுதந்திரத் தமிழீழ அரசு.
அரசு என்றால் வெறும் பெயரல்ல –
அது எங்கள் ஒழுங்கின் நெடுங்கோட்டை.

பள்ளிக் கல்வி –
போர்க்களம் சூழ்ந்தும்
எங்கள் பிள்ளைகள் பாடப்புத்தகம் தழுவிய தினம்.
மருத்துவமனைகள் –
படையெடுப்பின் நடுவிலும்
உயிர்களை மீட்ட அன்பின் அரண்மனை.
நீதிமன்றங்கள் –
சட்டத்தின் தராசு சாயாதபடி
நியாயம் காத்த மேடைகள்.
காவல் நிலையங்கள் –
சமாதானத்தின் காவலர்களாக
மக்களின் நிம்மதியை பாதுகாத்தன.

பொது நிர்வாகம் –
கடிதமும், ஆவணமும்,
முத்திரையும், கையொப்பமும்
அழகாகச் செயல்பட்டது.
போக்குவரத்து கழகம் –
குண்டுகளைக் கடந்தும்
மக்களை இலக்கில் சேர்த்தது.

வானொலி தமிழீழம் –
எங்கள் நெஞ்சின் ஒலியாக,
உலகம் முழுதும் பரவிய செய்தி.
தமிழீழத் தொலைக்காட்சி –
எங்கள் முகங்களின் ஒளியாய்,
எங்கள் குரலின் பிரதிபலிப்பாய் இருந்தது.

இது எல்லாம் நடந்தது –
விடுதலைப் புலிகளின் நேர்த்தியான ஆட்சி
அதன் ஒழுங்கு, அர்ப்பணிப்பு, கட்டுப்பாடு –
ஒரு நாடு என்பதன் உண்மையான அர்த்தத்தை
உலகுக்குக் காட்டியது.

அந்தக் காலத்து மக்கள் –
ஒற்றுமையைப் பாதுகாத்த புலிகள்,
அர்ப்பணிப்பை நெஞ்சில் காத்த வீரர்கள்,
தமிழ் என்றால் உயிரெனக் காத்த காவலர்கள்.

ஆனால் இன்று,
அந்த நிலம் – இரத்தம் குடித்த மண்,
சுதந்திரக் கொடியை காற்றில் ஆடவிட்ட வானம் –
மௌனத்தில் மூழ்கி நிற்கிறது.

இன்றைய தலைமுறைக்கு என் அழைப்பு –
நீங்கள் அந்தச் சின்னங்களின் வாரிசுகள்.
உங்கள் நெஞ்சில் வீரத்தை விதையுங்கள்,
உங்கள் இரத்தத்தில் தமிழை கலக்குங்கள்,
உங்கள் மனதில் ஒற்றுமையை எழுப்புங்கள்.

ஏனெனில்,
நாளைய தமிழீழம் –
உங்கள் தோளிலும், உங்கள் தியாகத்திலும்
மீண்டும் எழும்.