பாகிஸ்தானில் பருவமழை தீவிரமடைந்து கடந்த ஒரு மாதமாகவே மழை வெளுத்து வாங்கி வருகிறது. இதனால் பஞ்சாப், கைபர் பக்துன்க்வா, சிந்து, பலுசிஸ்தான் உள்ளிட்ட மாகாணங்கள் கடுமையாக பாதிக்கப்பட்டுள்ளன.
கடந்த 24 மணி நேரத்தில் பெய்த கனமழையால், கைபர் பக்துன்க்வா மாகாணத்தின் லோயர் டிர், பஜவுர், அபோட்டாபாத், ஜப்ராரி, சலார்சாய் உள்ளிட்ட பகுதிகளில் வெள்ளம் பாய்கிறது.
வீடுகள் இடிந்து விழுந்ததில், அந்த பகுதிகளில் குழந்தைகள் உள்பட 20க்கும் மேற்பட்டோர் உயிரிழந்தனர்.
இதேபோன்று பாக்., ஆக்கிரமிப்பு காஷ்மீரின் கில்கிட்-பால்டிஸ்தானில் உள்ள கிசர் மாவட்டத்தில் ஏற்பட்ட திடீர் வெள்ளத்தில் எட்டு பேர் இறந்தனர். வெள்ளத்தில் ஏராளமான வீடுகள் இடிந்து விழுந்ததுடன், பள்ளிகள், மருத்துவமனைகள் சேதமடைந்தன.
பஞ்ச்கோரா, ஜீலம் உள்ளிட்ட நதிகளில், அபாய கட்டத்தை தாண்டி வெள்ளம் பாய்கிறது. தண்ணீர் ஊருக்குள் புகுந்ததால், கார்கள், இருசக்கர வாகனங்கள் அடித்துச் செல்லப்பட்டன.
ஜீலம் பள்ளத்தாக்கு கடுமையாக பாதிக்கப்பட்டுள்ளதால், சுற்றுலா பயணியர், பாதுகாப்பான இடங்களுக்கு மாற்றப்பட்டனர்; 600க்கும் மேற்பட்ட சுற்றுலாப் பயணியர் வெளியேற முடியாத நிலை ஏற் பட்டுள்ளது. இந்த கனமழை காரணமாக இதுவரை, 154 பேர் உயிரிழந்துள்ளதாக தகவல் வெளியாகி உள்ளது.
