வெஸ்ட் இண்டீசில் கரீபியன் பிரிமியர் லீக் ‘டி-20’ தொடர் நடக்கிறது. தரவுபாவில் நடந்த போட்டியில் பார்படாஸ் ராயல்ஸ், டிரின்பாகோ நைட் ரைடர்ஸ் அணிகள் மோதின. முதலில் களமிறங்கிய பார்படாஸ் அணிக்கு ரூதர்போர்டு (45), கதீம் (41), கேப்டன் ராவ்மென் பாவெல் (31) கைகொடுத்தனர். 20 ஓவரில் 178/6 ரன் எடுத்தது. ரசல் 3 விக்கெட் சாய்த்தார்.
அடுத்து களமிறங்கிய டிரின்பாகோ அணிக்கு முன்ரோ, 44 பந்தில் 67 ரன் எடுத்தார். கேப்டன் நிக்கோலஸ் பூரன் தன் பங்கிற்கு அரைசதம் அடித்தார். 17.5 ஓவரில் 179/3 ரன் எடுத்து, 7 விக்கெட்டில் வெற்றி பெற்றது. பூரன் (40 பந்து, 65 ரன்), போலார்டு (19) அவுட்டாகாமல் இருந்தனர்.
இதையடுத்து போலார்டு, ‘டி-20’ அரங்கில் 14,000 ரன் (712 போட்டி) என்ற மைல்கல்லை எட்டினார். இந்த இலக்கை எட்டிய இரண்டாவது வீரர் ஆனார். முதலிடத்தில் வெஸ்ட் இண்டீசின் கெய்ல் (463ல் 14,562 ரன்) உள்ளார். அடுத்த 4 இடத்தில் அலெக்ஸ் ஹேல்ஸ் (507ல் 13,931, இங்கிலாந்து), வார்னர் (424ல் 13,595, ஆஸி.,), சோயப் மாலிக் (557ல் 13,571, பாக்.,), கோலி (414ல் 13,543) உள்ளனர்.
