Category:

Spirituality

திருநள்ளாறு சனீஸ்வரன் கோயிலில் நேற்று நடைபெற்ற சனிப்பெயர்ச்சி விழாவில் ஆயிரக்கணக்கான பக்தர்கள் தரிசனம் செய்தனர்.

by Amizhthu 7 March 2026

written by Amizhthu

புதுச்சேரி மாநிலம், காரைக்கால் அடுத்த திருநள்ளாறு ஸ்ரீதர்பாரண்யேஸ்வரர் கோவிலில் சனீஸ்வரர் தனி சன்னதியில் கிழக்கு நோக்கி அனுக்கிரக மூர்த்தியாக அருள்பாலித்து வருகிறார்.

இக்கோவிலில் இரண்டரை ஆண்டிற்கு ஒருமுறை சனிப் பெயர்ச்சி வெகு விமர்சையாக நடைபெறும். சனீஸ்வரர் நேற்று காலை 8:24 மணிக்கு கும்ப ராசியில் இருந்து மீன ராசிக்கு இடம் பெயர்ந்தார்.

அதனையொட்டி, நேற்று அதிகாலை 4:00 மணிக்கு கோவில் நடை திறக்கப்பட்டு, சனீஸ்வரருக்கு பால், சந்தனம், தேன், பன்னீர், இளநீர், நல்லெண்ணெய் உள்ளிட்ட 32 திரவியங்களால் சிறப்பு அபிேஷகம் மற்றும் தீபாராதனை நடந்தது. தொடர்ந்து, சனி பகவானுக்கு வைர அங்கி கவசம் அணிவித்து சகஸ்ர நாம அர்ச்னை செய்யப்பட்டது.

காலை 8.24 மணிக்கு மங்களவாத்தியங்கள் முழங்க, மகா தீபாராதனையுடன் சனி பகவான் கும்ப ராசியில் இருந்து மீன ராசிக்கு இடம் பெயர்ந்தார். பின், வசந்த மண்டபத்தில் தங்க காகம் வாகனத்தில் சனிபகவானுக்கு மகா தீபாரதனை நடைபெற்றது.

சனிப்பெயர்ச்சியையொட்டி, நாட்டின் பல்வேறு பகுதிகளில் இருந்து கோவிலில் குவிந்த பக்தர்கள், தோஷங்கள் நீங்க வேண்டி நேர்த்திக்கடனாக மொட்டை அடித்தும், கோவிலின் எதிரில் உள்ள நளன் குளித்தில் நீராடி, கலிதீர்த்த விநாயகரை வணங்கி, சிதர் தேங்காய் உடைத்து சுவாமியை வணங்கினர்.

சனிப் பெயர்ச்சி பூஜையில், புதுச்சேரி கவர்னர் கைலாசநாதன், தருமை ஆதீனம் 27வது குருமகா சந்நிதானம் கயிலை மாசிலாமணி தேசிக ஞானசம்பந்த பரமாசார்ய சுவாமி, அமைச்சர் திருமுருகன், முன்னாள் அமைச்சர் சாய்சரவணன் குமார், அரசு கொறடா ஆறுமுகம், எம்.எல்.ஏ.,க்கள் ராஜசேகரன், சிவா, டி.ஜ.ஜி., சத்தியசுந்தரம், கலெக்டர் இஷிதா ரதி, கோவில் நிர்வாக அதிகாரி சுப்ரமணியன் உள்ளிட்டோர் கலந்து கொண்டனர்.

7 March 2026 0 comments

Spirituality

மறைமுக எதிரிகளின் பாதிப்புகளை நீக்க சிறப்பு வழிபாடு

by Amizhthu 3 March 2026

written by Amizhthu

எம்மில் பலரும் தங்களுக்குத் தெரிந்த சூட்சமமான விடயத்தை பாவித்து ஒரு காரியத்தை வெற்றிகரமாக நிறைவேற்றி அதனூடாக தங்களுடைய வாழ்வாதாரத்தை பெற்று வருவர்.

இந்த வெற்றி சூத்திரத்தை மற்றவர்களுடன் ஒருபோதும் பகிர்ந்து கொள்வதில்லை. இந்நிலையில் உங்களுடைய காரியங்களில் தொடர் தோல்விகளோ அல்லது தடையும், தாமதங்களோ ஏற்பட்டால்… உங்களுக்கு உங்களையும் அறியாமல் மறைமுக எதிரிகள் உருவாகி விட்டார்கள் என கருதலாம். சிலர் தங்களுடைய மறைமுக எதிரி யார் என்பதை துல்லியமாக அவதானிப்பர்.

ஆனால் பலருக்கு இது தொடர்பான அவதானம் எளிதாக கை வரப் பெறுவதில்லை. இந்நிலையில் மறைமுக எதிரிகளால் தொல்லைகளை எதிர் கொள்பவர்களும், வளர்ச்சிக்கு தடையாக இருக்கிறது என கருதுபவர்களும், அவர்களுடைய பாதிப்பிலிருந்து தற்காத்து, மீண்டும் வெற்றி பெறுவதற்கான சூட்சம பரிகாரத்தை எம்முடைய முன்னோர்கள் வழங்கி உள்ளனர்.

இதற்கு தேவையான பொருட்கள்: சுத்தமான கரும்புள்ளி ஏதுமற்ற பழுதற்ற ஆறு எலுமிச்சை பழங்கள்.

இந்த ஆறு எலுமிச்சை பழத்தை உங்களுடைய இடது கையில் வைத்துக் கொண்டு உங்கள் தலையை இடமிருந்து வலமாக மூன்று முறையும், வலமிருந்து இடமாக மூன்று முறையும் சுற்றி அதனை உங்கள் வீட்டிற்கு அருகே உள்ள உக்கிர தெய்வங்களான காளி, பிரத்தியங்கிரா தேவி, கருமாரியம்மன் போன்ற உக்கிர தெய்வங்களின் சன்னதியின் முன் அமையப்பெற்றிருக்கும் திரிசூலத்தில் உங்களுக்கு தொல்லை கொடுக்கும் எதிரியாக திகழும் நபரின் பெயரை உச்சரித்து அவர் எம்முடைய வழியில் குறுக்கிடக்கூடாது என்பதை மனதில் தியானித்து ஆறு பழங்களையும் தொடர்ச்சியாக திரிசூலத்தின் முனைப்பகுதியில் அழுத்தி வைத்திட வேண்டும்.

பெயர் தெரியாதவர்கள் மறைமுக எதிரிகளிடமிருந்து பாதுகாப்பு வேண்டும் என தியானித்து, அதனை திரிசூலத்தின் முனைப்பகுதியில் அழுத்தி வைத்து விட வேண்டும்.

இதனை தொடர்ந்து ஐந்து முறை உங்கள் விருப்பத்திற்குரிய நாளில் மேற்கொண்டால் உங்களுக்கு தொல்லை கொடுத்த மறைமுக எதிரி மறைந்து விடுவர்.

ஆனால் இதை நீங்கள் தவறாக பாவித்தால்.. நீங்கள் கடுமையாக பாதிக்கப்படுவீர்கள் என்பதையும் நினைவில் கொள்ளுங்கள்.

3 March 2026 0 comments

Spirituality

தைப்பூசம் வரலாறு – தமிழ்க்கடவுள் முருகன் வீரவேலை கையில் ஏந்திய நாள்!

by Amizhthu 1 February 2026

written by Amizhthu

அசுரனை அழிக்க அன்னையிடம் வீரவேலை வாங்கி, தமிழ்க்கடவுள் முருகன் கையில் ஏந்திய நாளே தைப்பூசம் ஆகும்.

தமிழ் கடவுளான முருகப்பெருமானின் திருவிழாக்களில் முக்கியமானது தைப்பூசம் ஆகும். 27 நட்சத்திர மண்டலங்களில் எட்டாவது நட்சத்திரம் பூசம் ஆகும். தை மாதத்திலே பூச நட்சத்திரம் வரும் புண்ணிய நாள் தைப்பூச விழாவாக இந்துக்களால் கொண்டாடப் படுகின்றது.

தைப்பூசம் வரும் நாள் பெரும்பாலும் நிறைமதி நாளாக இருக்கும்.தைப்பூசம் முருகப்பெருமானுடைய விஷேட தினமாகும். அன்றைய தினம் குழந்தைகளுக்கு தோடு குத்துதல், ஏடு தொடக்குதல் போன்றவற்றை சிறப்பாக செய்வார்கள்.

மற்றும் அடியார்கள் காவடி எடுத்தல், போன்ற நேர்த்திக்கடன்களை நிறைவேற்றுவார்கள்.இந்த நாளில் #ஆறுபடை வீடுகள் உள்ளிட்ட அனைத்து முருகன் கோவில்களிலும், எல்லா சிவன் கோவில்களிலும் திருவிழாக்கள் நடைபெறுகின்றன.

தமிழ்நாட்டில் மட்டுமல்லாது மலேசியா, சிங்கப்பூர் என உலகின் பல்வேறு நாடுகளில் உலகெங்கிலும் உள்ள தமிழர்களால் வெகு சிறப்பாக கொண்டாடப்படுகின்றது.

தைப்பூசத்தன்று முருகப் பெருமான் கோவில்களில் பக்தர்கள் காவடி, பால்குடம் எடுத்தல் போன்ற பல்வேறு நேர்த்திக் கடன்களை செலுத்துகின்றனர்.

வரலாறு தேவர்களுக்கும் அசுரர்களுக்கும் இடையே ஏற்பட்ட போரில் தேவர்களால் அசுரர்களை அழிக்க முடியவில்லை. எனவே பல்வேறு இன்னல்கள் கொடுத்து வந்த அசுரர்களை அழிக்க வேண்டி சிவபெருமானிடம் தேவர்கள் முறையிட்டனர்.

தங்களால் அசுரர்களை அழிக்க முடியவில்லை.எனவே தங்களுக்கு தலைமை தாங்கிச் செல்லக்கூடிய ஆற்றல்வாய்ந்த, சக்தி மிக்க ஒரு தலைவனை உருவாக்க வேண்டும் என்று அவர்கள் சிவபெருமானிடம் வேண்டினர்.

கருணைக்கடலாம் எம்பெருமான், தேவர்களின் முறையீட்டை ஏற்று தனது தனிப்பட்ட சக்தியால் உருவாக்கிய அவதாரமே கந்தன்.

சிவனின் நெற்றிக்கண்ணில் இருந்து வெளியான 6 தீப்பொறிகள் 6 அழகான குழந்தைகளாயின. கார்த்திகைப் பெண்களால், அக்குழந்தைகள் வளர்க்கப்பட்டு பின்னர் ஆறுமுகங்களுடன் அவதரித்தது.

அப்படி அவதரித்தவரே #கந்தன் எனப்படும் முருகனாவார். சிவபெருமானின் தேவியான அன்னனை பார்வதி தேவியானவள் ஆண்டி கோலத்தில் பழனி மலையில் வீற்றிருக்கும் முருகப்பெருமானுக்கு ஞானவேல் வழங்கியது தைப்பூச நாளில்தான்.

அதன் காரணமாகவே பழனி மலையில் தைப்பூசத்திருவிழா மற்ற முருகன் கோவில்களைக் காட்டிலும் வெகுச்சிறப்பாகக் கொண்டாடப்படுகிறது. அப்படி அளிக்கப்பட்ட வேலினை ஆயுதமாகக் கொண்டே முருகன் அசுர குலத்தை அழித்து தேவர்களைக் காப்பாற்றினான்.

தேவர்களுக்குத் தொல்லை கொடுத்த அரக்கர்களை திருச்செந்தூர் எனப்படும் #திருச்சீரலைவாயில் வதம் செய்து தேவர்கள் நிம்மதி அடையச் செய்தவர் முருக கடவுள்.

எனவே தான் அசுரர்களை வதம் செய்ய முருகப்பெருமான் பயன்படுத்திய வேலினை வழிபட்டால், தீய சக்திகள் நம்மைத் தாக்காமல் இருப்பதுடன், அந்த சக்திகள் நமக்கு அடி பணிந்து நல்லருளை நல்கும் என்பது ஐதீகம்.

தைப்பூசத்தை முன்னிட்டு முருக பக்தர்கள், மார்கழி மாத ஆரம்பத்தில் துளசி மாலை அணிந்து விரதத்தை தொடங்குகின்றனர்.

சஷ்டி கவசம், சண்முக கவசம், திருப்புகழ் போன்ற பாடல்களை அன்றாடம் பாராயணம் செய்து தைப்பூசத்தன்று பழனி முருகன் கோவிலில் சிறப்பு வழிபாடு செய்து விரதத்தை முடிப்பார்கள்.

ஆறுமுகப் பெருமானின் அருளை அடைவதற்கு தைப்பூசம் உகந்த நாள். முருகப்பெருமானின் ஆறுபடை வீடுகளிலும் முருகனடியார்கள் பலர் பாதயாத்திரையாகச் சென்று தைப்பூசத்தன்று முருகனை தரிசித்து விரதத்தை நிறைவு செய்யும் வழக்கத்தைக் கொண்டுள்ளனர்.

தைப்பூசத்தன்று முருகனுக்கு காவடி நேர்த்திக்கடன் செலுத்து வதையும் பக்தர்கள் வழக்கமாகக் கொண்டுள்ளனர்.

தங்களின் வேண்டுதல் நிறைவேறியதும், பழனி முருகன் கோவிலில் பக்தர்கள் தைப்பூச தினத்தன்று காவடி நேர்ச்சையை செலுத்துகிறார்கள்.

1 February 2026 0 comments

Spirituality

கோடி லிங்க தரிசனத்தை தரும் அன்னாபிஷேகம்

by Amizhthu 15 January 2026

written by Amizhthu

ஒவ்வொரு மாதத்திலும் வரக்கூடிய பௌர்ணமி என்பது அனைத்து தெய்வங்களுக்கும் உகந்த திதியாக கருதப்படுகிறது.

அதிலும் குறிப்பாக சிவபெருமானுக்கு உகந்த திதியாக கருதப்படுகிறது. பலரும் ஒவ்வொரு மாதமும் வரக்கூடிய பௌர்ணமி நாளன்று சிவபெருமான் ஆலயத்திற்கு சென்று சிவபெருமானை வழிபாடு செய்வார்கள்.

அதே போல் திருவண்ணாமலைக்கு சென்று கிரிவலமும் செய்வார்கள். ஒவ்வொரு மாதத்திலும் வரக்கூடிய ஒவ்வொரு பௌர்ணமிக்கு ஒவ்வொரு விதமான விசேஷங்கள் இருந்தாலும் ஐப்பசி மாதத்தில் வரக்கூடிய பௌர்ணமிக்கு மிகவும் சிறப்பு மிகுந்த விசேஷம் இருக்கிறது.

அன்றைய தினம் தான் அனைத்து சிவாலயங்களிலும் அன்னாபிஷேகம் என்பது நடைபெறும். அன்னாபிஷேகம் பூஜை வழிபாடு யார் ஒருவர் கோடி லிங்க தரிசனத்தை செய்கிறார்களோ அவர்களுக்கு மறுபிறவி அற்ற நிலை உண்டாகும் என்று சிவபெருமானே கூறியிருக்கிறார்.

அனைவராலும் சுலபத்தில் கோடி லிங்க தரிசனத்தை காண இயலாது அல்லவா? அதற்காக தான் ஒவ்வொரு வருடமும் ஐப்பசி மாதத்தில் அனைத்து சிவாலயங்களிலும் அன்னாபிஷேகம் நடைபெறும். இந்த அன்னாபிஷேகத்தை யார் ஒருவர் தரிசனம் செய்கிறார்களோ அவர்கள் கோடி லிங்க தரிசனத்தை செய்த பலனை பெறுவார்கள்.

ஒவ்வொரு அரிசியும் சிவலிங்கமாக பாவிக்கப்பட்டு அன்றைய தினம் நாம் வழிபாடு செய்வதால் தான் கோடி லிங்க தரிசனத்தை நம்மால் அன்றைய தினம் செய்ய இயல்கிறது.

இந்த முறையில் வழிபாடு செய்து முழு பலனையும் பெறுவோம் என்ற தகவலை கூறி இந்த பதிவினை நிறைவு செய்து கொள்கிறோம்.

15 January 2026 0 comments

Spirituality முதன்மை செய்திகள்

இன்று (21.09.2025) மகாளய அமாவாசை – காகத்திற்கு உணவிடுங்கள்.

by Amizhthu 21 September 2025

written by Amizhthu

எத்தனையோ பறவைகள் இருக்க, மகாளயபட்ச அமாவாசை அன்று காகத்திற்கு மட்டும் ஏன் உணவளிக்க வேண்டும் என மஹாபெரியவரிடம் கேட்டார் ஒருவர்.

”தன் குரலையே பெயராகக் கொண்டது காகம். ‘மியாவ்’ என கத்தும் பூனையையும், ‘கிக்கி’ எனக் கத்தும் கிளியையும் நாம் அப்படி அழைப்பதில்லை. ஆனால் ‘கா’ எனக் கத்தும் இதை மட்டும் ‘காகம்’ என்றே அழைப்பது ஏன் தெரியுமா…

‘கா’ என்றால் ‘காப்பாற்று’. அதற்கு உணவிடும் போது, ‘கா.. கா..’ என சத்தமிடுகிறோம். அதாவது முன்னோரை அழைத்து எங்களைக் காப்பாற்றுங்கள் என வேண்டுகிறோம். எங்கும் இருக்கும் பறவையான காகத்தை தேட வேண்டியதில்லை. அறிவும், அழகும் கொண்ட அப்பறவை அதிகாலையில் விழிப்பதோடு, நம்மையும் எழுப்புகிறது. அது ஒருபோதும் தனியாக உண்ணாது.

உணவு கிடைத்தவுடன் மற்ற காகத்துடன் பகிர்ந்துண்ணும். சூரியன் மறைந்ததும் இருப்பிடத்திற்கு சென்று ஓய்வெடுக்கும். இரவில் (இரவு 7:00 மணிக்குப் பின்) உண்ணக் கூடாது என வேதம் அறிவுறுத்துகிறது. இதை நாம் கடைபிடிக்கிறோமா.. இல்லையே.. முன்னோரின் அறிவுரையை நமக்கு எடுத்துச் சொல்கிறது காகம்.

நாம் உணவிடும் போது காகம் மகிழ்கிறது. அது உண்பதைக் கண்டு நாமும் மகிழ்கிறோம். இந்நிலையில் ‘இருவருமே கடவுள்’ என்கிறது அத்வைதம். இப்படி தத்துவத்தையும் காகம் நமக்கு உணர்த்துகிறது. அதற்கு உணவிடச் சொன்ன நம் முன்னோர்கள் முட்டாள்கள் அல்ல. அதற்கு காரணம் இருக்கிறது.

ஆலமரம், அரச மரம் ஆகிய இரண்டும் சிறப்பானவை. பரம்பரையை அடையாளம் காட்டுவது ஆலமரம்.

அதனால் தான் ஆல் போல தழைத்து வாழ வேண்டும் என மணமக்களை வாழ்த்துகின்றனர். மரங்களின் அரசனான அரசமரம் மும்மூர்த்திகளின் அடையாளம். இந்த இரண்டையும் யாராவது விதைத்து பார்த்திருக்கிறீர்களா… காகம் இடும் எச்சத்தின் மூலம் இந்த விதைகள் வளர்கின்றன. இந்த மரங்களுக்காகவே காகம் உயிர் வாழ்வது அவசியம். அதனால்தான் காகத்திற்கு உணவளிக்கிறோம். இந்த மரங்களை பார்க்கும் போது முன்னோரின் ஞாபகம் உங்களுக்கு வர வேண்டும்” என்றார் காஞ்சி மஹாபெரியவர்.

காலை 9:00, மதியம் 1:00, இரவு 7:00 மணிக்குள் உணவு அருந்துங்கள்.

21 September 2025 0 comments

Spirituality

நவராத்திரி “கொலு” தத்துவம்.

by Amizhthu 20 September 2025

written by Amizhthu

நவராத்திரியின் போது வீட்டில் கொலு வைத்து அம்பிகையை வழிபடுகிறோம். கொலு பொம்மைகள், வாழ்விற்கான நல்ல படிப்பினைகளை தருகிறது.

கொலு என்பதற்கு அழகு என்பது பொருள். பராசக்தி பலவிதமான கோலங்களில் அழகுடன் வீற்றிருப்பதால் ‘கொலு’ என்று பெயர் உண்டானது.

கொலு வைப்பதற்கு முன் வீட்டை சுத்தமாக்கி, வண்ணக் கோலங்களால் அழகு படுத்த வேண்டும். வாசலில் மாவிலைத் தோரணம் கட்டுவது அவசியம். மரப்பலகையால் சிறு மண்டபம் அமைத்து அதன் நடுவில் உயரமான பலகையை சிம்மாசனமாக வைக்க வேண்டும். அதன் மீது பட்டுப்புடவை விரித்து, மண் அல்லது உலோகத்தால் ஆன அம்மன் சிலையை வைக்க வேண்டும். சிலை இல்லாவிட்டால் அம்மன் படத்தை வைக்கலாம்.

வலப்புறத்தில் கலசம் வைக்க வேண்டும். கலசத்தையும் அம்மனாக பாவித்து வணங்க வேண்டும். தினமும் மாலையில் அம்மனை அலங்கரிக்கும் போது கலசத்திற்கும் மலரிட்டு வணங்க வேண்டும்.

முதல்படி முதல் ஆறாம்படி வரை ஒரறிவு முதல் ஆறறிவு உயிர்களை அடுக்குதல் வேண்டும். முதல்படியில் புல், செடி, கொடி முதலிய தாவர பொம்மைகளும், இரண்டாம் படியில் சங்கு, சிப்பியாலான பொம்மைகளும், மூன்றாம் படியில் ஈ, எறும்பு முதலிய உயிர்களும், நான்காம் படியில் வண்டு, நண்டு போன்றவையும், ஐந்தாம்படியில் பறவை, மிருகம் போன்றவையும், ஆறாம்படியில் வணிகர், குறவன், பாம்பாட்டி, போலீஸ் போன்ற மனிதர் சிலைகளை அடுக்க வேண்டும். ஏழாம் படியில் முனிவர், மகான் போன்ற உயர்நிலை மனிதர்களையும், எட்டாவது படியில் இந்திரன், குபேரன் போன்ற தேவர்கள், நவக்கிரகங்களையும் வைக்க வேண்டும். ஒன்பதாம் படியில் பிரம்மா, விஷ்ணு, சிவன், சரஸ்வதி, லட்சுமி, பார்வதி போன்ற தெய்வங்களையும் அடுக்க வேண்டும். பொம்மைகள் கிடைக்காவிட்டால், எல்லா படிகளிலும் தெய்வச்சிலைகளை அடுக்கலாம்.

படிகளின் எண்ணிக்கை ஒற்றைப்படையில் இருக்க வேண்டும். பொதுவாக 5 அல்லது 7 என்ற எண்ணிக்கையில் வைப்பர்.

இந்த படிகளைப் போல மனிதனும் வாழ்வில் பல படிநிலைகளைக் கடக்க வேண்டியிருக்கிறது என்பதை இது உணர்த்துகிறது. மேல்நோக்கிச் செல்லும் படி போல, மனிதனும் வாழ்வில் உயர வேண்டும் என்பதே கொலுவின் நோக்கம். ஓரறிவாக உயிராக இருந்த நாம், பரிணாம வளர்ச்சியால் தற்போது ஆறறிவு பெற்ற மனிதராகப் பிறந்திருக்கிறோம். இதை பயன்படுத்தி நல்வழியில் வாழ்ந்தால் அம்பிகையின் அருளால் தெய்வ நிலையை அடையலாம் என்பதையே கொலு உணர்த்துகிறது.

20 September 2025 0 comments