2026 குளிர்கால அட்டவணைக்கான தனது வலையமைப்பை விரிவுபடுத்தும் நடவடிக்கையின் ஒரு பகுதியாக, லண்டன் கொட்விக் – கொழும்பு நேரடி விமான சேவையை மீண்டும் அறிமுகப்படுத்துவதாக பிரிட்டிஷ் ஏர்வேஸ் நிறுவனம் அறிவித்துள்ளது.
இதன்படி, 2015 ஆம் ஆண்டிற்குப் பிறகு இலங்கைக்கு மீண்டும் சேவையை ஆரம்பிக்கும் இந்த நிறுவனம், 2026 ஒக்டோபர் 23 ஆம் திகதி முதல் வாரத்திற்கு மூன்று முறை இந்த விமான சேவையை இயக்கத் திட்டமிட்டுள்ளது.
இந்த பருவகால (Seasonal) சேவை மூலம், பயணிகள் லண்டனிலிருந்து இலங்கைக்கு நேரடி சேவையை பெறவுள்ளனர். இயற்கையான அழகிய கடற்கரைகள், வனவிலங்குகள் சரணாலயம், பண்பாட்டு சிறப்புகள் மற்றும் பல்வகை உணவு கலாச்சாரம் ஆகியவற்றால் புகழ்பெற்ற இலங்கைக்கு இது முக்கியமான முன்னேற்றமாகக் கருதப்படுகிறது.
மூன்று வகை பயண சேவைகள்
பயணிகளுக்காக மூன்று வகை கேபின் சேவைகள் வழங்கப்படுகின்றன:
- World Traveller (Economy)
- World Traveller Plus (Premium Economy)
- Club World (Business Class)
இந்த விமான சேவைகள், Boeing 777 விமானங்களின் மூலம் இயக்கப்படவுள்ளதுடன், நீண்ட தூரப் பயணங்களுக்கு ஏற்ற மூன்று வகை இருக்கை அமைப்புகளும் இடம்பெறும்.
